İnklüziv təhsil : Valideynlər üçün bələdçi

Abstract

Təhsil insanlara bilik, bacarıq, dəyərlər verən bir proses olmaqla yanaşı həm də həyata hazırlıq mərhələsidir. Cəmiyyətin bərabərhüquqlü üzvünə çevrilmək və hərtərəfli inkişaf etmək istəyən hər bir şəxsin təhsil alması vacibdir. Bu, eyni zamanda kimliyindən asılı olmayaraq hər bir vətəndaşın hüququdur. Hər kəs kimi əlilliyi olan şəxslər də təhsil, daha doğrusu keyfiyyətli inklüziv təhsil almaq hüququna malikdir. İnklüziv təhsilin keyfiyyətini təmin edən bir çox amillər vardır ki, bunlardan da biri valideynlərin təhsil prosesində fəal iştirakı və təhsil müəssisəsi ilə yaxından əməkdaşlıq etməsidir. Lakin bir çox hallarda valideynlər müəyyən səbəblərdən – laqeydlik, səriştəsizlik, məlumatsızlıq və s. kimi səbəblərdən bu prosesdən kənarda qalır və təhsilə öz töhfələrini verə bilmirlər. Bunun mənfi nəticələriylə isə övladlarımız üzləşməli olur. Məhz bunu nəzərə alaraq Avropa İttifaqının maliyyə dəstəyi ilə “Regional İnkişaf” İctimai Birliyi (RİİB) tərəfindən həyata keçirilən “Müəllimlərin inklüziv təhsil sahəsində bacarıqlarının artırılması” layihəsi çərçivəsində valideynləri inklüziv təhsil və əlillik məsələləri ilə bağlı məlumatlandırmaq üçün silsilə tədbirlərin icrası və maarifləndirici materialların hazırlanması nəzərdə tutulmuşdur. Oxuduğunuz bu kitabça sizi inklüziv təhsilin mahiyyəti ilə yaxından tanış etməklə yanaşı, əlilliyi olan uşaqların inklüziv təhsilə cəlb olunması işində sizə bələdçilik edəcək. Kitabçada eyni zamanda əlilliyi olan uşaqların valideynlərinin real həyat təcrübəsinə əsaslanan qeydlər də öz əksini tapıb. Bu qeydlər bir daha onu göstərir ki, uşaqların, ələlxüsus əlilliyi olan uşaqların həyatda özlərinə layiqli yer tapmasında valideynlərin çox böyük rolu vardır. Ümid edirik bu kitabça faydalı maarifləndirici vəsait kimi ölkəmizdə inklüziv təhsilin inkişafına dəstək olmaq işində valideynləri həvəsləndirəcək və onlara yaxşı bələdçilik edəcək.