Məllimlərin Yanaşmasında Kollec Rəhbərlərinin Liderlik Xüsusiyyətlərinin Öyrənilməsi:Region Nümunəsində

Abstract

“Müəllimlərin yanaşmasında kollec rəhbərlərinin liderlik xüsusiyyətlərinin öyrənilməsi: region nümunəsində” adlı layihə əsaslı tədqiqat müəllimlərin kollec rəhbərlərinin liderlik xüsusiyyətlərini qiymətləndirməsini və onların demoqrafik göstəricilərinin bu xüsusiyyətlərin müəyyən olunmasına təsirini araşdırır. 1037 kollec müəllimi arasında onlayn sorğu vasitəsilə toplanmış data kəmiyyət tədqiqat yanaşmasından istifadə olunmaqla təhlil edilmişdir. Nəticələr göstərir ki, transformasiya liderliyi kollec rəhbərləri arasında üstünlük təşkil edən liderlik tərzidir. Bundan əlavə, cins, təhsil səviyyəsi və ixtisas kimi demoqrafik dəyişənlərin liderlik xüsusiyyətlərinin müəyyən olunmasına əhəmiyyətli dərəcədə təsir etdiyi aşkar edilmişdir. Tədqiqatın diqqətəlayiq nəticəsi postsovet təhsili kontekstinə, xüsusən də Azərbaycan üçün uyğun olan yeni ölçmə vasitəsinin təsdiqi və uyğunlaşdırılmasıdır. Bu tədqiqat transformasiya liderliyi nəzəriyyələrinin, xüsusən də Bass və Avolio (1990) tərəfindən təklif olunanların təhsil mühitində mədəniyyətlərarası tətbiqini təsdiq etməklə mövcud ədəbiyyata töhfə verir. Əsasən biznes və sənaye mühitlərində aparılan əvvəlki tədqiqatlardan fərqli olaraq, bu tədqiqat kolleclərdə liderlik davranışlarına diqqət yetirir və kontekst baxımından daha uyğun perspektiv təklif edir. Nəticələr müxtəlif təhsil sistemlərində liderliyin qiymətləndirilməsində və inkişafında sosial-mədəni amillərin nəzərə alınmasının vacibliyini vurğulayır.