ADAlılar | Issue 1 | Winter 2019-20

Abstract

Əziz ADAlılar, Maraqlı müraciət formasıdır, deyilmi? Bildiyimiz kimi, Azərbaycan dilində “lı”, “li”, “lu” şəkilçiləri insanın müəyyən yerə, məkana aid olduğunu, bağlılığını bildirir. Məncə, ADA məktəbinin hər bir şagirdi, müəllimi, administrativ işçisi, bu böyük kollektivin hər bir üzvü ADAlı adlandırıla bilər. Jurnalımızın adı da elə buradan yarandı – ADAlılar. Hər birimizin həyatında məktəb mühüm bir rol oynayır, məktəblə unudulmaz xatirələrimiz bağlıdır. Bu xatirələr bizim üçün ona görə doğma və dəyərlidir ki, burada ilk dostlarımızı qazanırıq, ilk nailiyyətlərimizə sevinirik, uğursuzluqlarımıza kədərlənirik, ilk müəllimlərimizlə tanış oluruq, vətəndaş kimi formalaşırıq. Bu günün şagirdləri sabah “həyat” adlanan dalğalı dənizə öz xırda qayıqları ilə səyahətə çıxacaqlar. O dalğalar onları hara aparacaq, kim bilir... Məktəb olaraq, vəzifəmiz bu bilik qayıqlarını daha möhkəm etmək, şagirdlərə düzgün yol göstərmək, onları layiqli vətəndaş kimi formalaşdırmaqdan ibarətdir. ADA məktəbində şagirdlərə müstəqil qərar verməyi, özünü ifadə etməyi, sosial aktiv olmağı öyrədirik. Bunun üçün biz, məktəb administrasiyası olaraq, var gücümüzlə işləyirik – uşaqlarda hər hansı talantı müəyyən edərək, onu inkişaf etdirməyə, şagirdlərlə müxtəlif sosial-mədəni layihələr üzərində çalışırıq. Bu layihələrdən biri də ADAlılar jurnalıdır. Düşündük ki, şagirdlərin öz mətbu orqanı olsun, amma, ənənəvi divar qəzeti kimi yox, daha müasir, parlaq jurnal formasında. İstədik ki, burada uşaqlar öz fikirlərini, onları narahat edən məsələləri, məktəb və məktəbdən kənar həyat barədə düşüncələrini elə öz dillərində ifadə etsinlər. Eyni zamanda, jurnalistikanın bir növ əsaslarını öyrənsinlər, məsələləri düzgün və obyektiv işıqlandırmağı bacarsınlar, Zati-Aliləri “Söz”-dən istifadə etmək vərdişlərinə yiyələnsinlər. Necə alındığına siz qiymət verin. Amma çox da tələbkar olmayın – bu, ADA məktəbinin şagirdlərinin intellektual məhsulu olan bir həvəskar jurnaldır və rəsmi xarakter daşımır. İmkandan istifadə edərək, hamınızın qarşıdan gələn Yeni İl bayramınızı təbrik edirəm. Qoy 2020 hər bir ADAlıya bol-bol uğurlar gətirsin! Samir Javadov Editor-in-Chief